Bhiwandi ke Thana Road area me ek lohe ka khamba achanak road par girne se poore area me afra-tafri mach gayi. Local logon ke mutabik kuch ghante pehle ek gaadi ne is khambhe ko takkar maari thi, jiske lagbhag aadhe ghante baad khamba achanak road par gir gaya. Ganimat rahi ki is haadse ke waqt road par zyada bheed nahi thi, warna koi bada haadsa ho sakta tha. Is ghatna me kisi ko chot nahi aayi aur na hi koi bada nuksan hua, lekin logon me darr ka mahaul dekhne ko mila.

Sthanik logon ka kehna hai ki agar ye khamba kisi gaadi ya insaan par girta to jaanleva haadsa ho sakta tha. Logon ne administration aur sambandhit vibhag par laparwahi ka aarop lagate hue kaha ki kai jagahon par purane aur kamzor khambhe khatre ka sabab bane hue hain. Ghatna ke baad nagrikon ne administration se area ki safety arrangement mazboot karne, khambon ki checking karne aur future me aisi ghatna rokne ke liye turant kadam uthane ki maang ki hai.